Norvège: Amb.Nkulikiyinka yahuye n’Abanyarwanda n’inshuti zabo, anareshya abashoramari

0

Amb. Christine Nkulikiyinka yahuye n’abanyarwanda n’abashoramari mu mujyi wa Oslo, kuwa Gatanu tariki ya 20 Mutarama 2017, nyuma yo gushyikiriza Umwami wa Norvège, Harald V, impapuro zimwemerera guhagararira u Rwanda muri icyo gihugu.

Mu kiganiro na IGIHE, Amb. Nkulikiyinka yavuze ko nyuma yo kwakirwa n’Umwami wa Norvège, yifuje guhura n’abanyarwanda intambwe ikomeye y’umubano u Rwanda rwari rugezeho.

Amb. Nkulikiyinka anavuga ko yanabanje kugira akanya ko kureshya abashoramari.

Yagize ati “Mu gitondo nari nabanje guhura kandi n’abashoramari bashaka gukorera mu Rwanda, aho naberetse isura y’u Rwanda rw’uyu munsi, baganira ku bisabwa ngo babe batangira business mu Rwanda, babwirwa opportunités zihari n’ibindi.”

Abashoramari baganiriye harimo abacuruza ikawa, abakora mu by’ingufu, ubuhinzi n’ibinid, bakangurirwa kuzasura u Rwanda mu rugendo rutegurwa mu Ukwakira 2017 kugira ngo bazirebere uko bimeze.

Abonana n’Abanyarwanda, wabaye umugoroba wo kuganira no gusabana, abasobanurira ibyo yaganiriye n’Umwami wa Norvege Harald V, wamwakiriye akanamugezaho indamutso ya Perezida Paul Kagame.

Ati “Muri ibyo biganiro twagarutse ku byaranze 2016, ariko tunibukiranya ko 2017 ari umwaka tuzitorera Perezida wa Repubulika, mbasaba guziyandikisha ku ma lisite y’amatora ari benshi ngo bizatabire uko bikwiye icyo gikorwa.”

Amb. Nkulikiyinka yakomeje agira ati “Abanyarwanda nabo banyijeje ko bishimiye umubano uri hagati y’u Rwanda na Norvège, bizeza ubuyobozi bwa Ambasade ko bazabufasha gukomeza kuwuteza imbere kandi bakawubyaza n’umusaruro.”

Yanashimiye Uhagarariye inyungu z’u Rwanda muri Norvege, Steiner Sundvol, uburyo akora cyane mu kumenyekanisha u Rwanda muri iki gihugu.

Ambasaderi w’u Rwanda yanahaye ubutumwa Abanyarwanda kugira uruhare mu kurwanya utifuriza iterambere u Rwanda.

Ati“Nabibukije kandi ko n’ubwo twubaka umubano mwiza n’amahanga nk’uko bigaragarira buri wese, ariko hariho bamwe mu nyungu zabo bwite baba bashaka gusenya ibigerwaho n’ubuyobozi bw’u Rwanda nti ‘mudufashe kubarwanya aho bari hose, bo gukomeza kudutesha umwanya mu iterambere turimo.”

Mu Banyarwanda bagiranye ibiganiro na Ambasaderi harimo n’urubyiruko rwishimiye kuganira n’ubuyobozi bw’Ambasade mu byifuzo bafite byo kwiteza imbere no guteza imbere igihugu baturukamo u Rwanda.

Amb. Nkulikiyinka ati “Mu butumwa Abanyarwanda bansabye kubagereza kuri Perezida Paul Kagame ni uko bifuza ko yazabasura, kuko igihe yacaga ino mu mwaka wa 2015, ntibabashije kubona umwanya uhagije wo kuganira nawe ngo bamugaragarize uko bamushyigikiye mubyo abagejejeho nk’umuyobozi mwiza ubereye u Rwanda kandi ko bamukunda, bati ‘turifuza rwose ko yazadushakira umwanya natwe.”

Umugoroba wo gusangira n’Abanyarwanda wijihijwe no mu muco w’u Rwanda, bifashijwemo n’ababyinnyi b’abanyarwanda bari mu itorero « Inyange ».

Ambasaderi Nkulikiyina ashyikiriza Umwami wa Norvège, Harald V, impapuro zimwemerera guhagararira u Rwanda

Amb. Nkuliliyinka mu biganiro n’abanyarwanda bo muri Norvège

Amb. Nkuliliyinka mu biganiro n’abashoramari

Amb. Nkulikiyinka n’umugabo we Jacques Nshimyumukiza

Itorero Inyange ryasusurukije umugoroba w’ibaganiro na Amabasaderi

Yanditswe na Karirima A. Ngarambe

Leave a Reply